شعر شعبي عراقي
نتغازل
عماد
ياسين مجيد آل شهزي الطائي
الإهداء ..
إلى ..كل قلب عاشق
خوان
خوان دولبني الوكت .. بمحبتك خوان
خوان روحي تعذبت .. وتمر مرت يفلان
يفلان غرﮔـني زماني .. ابجر أحزان
أحزان فرﮔاك تحز بـﭼـلاي .. ﭼن صخر صوان
صوان ﮔلبك علي ﮔلبي ذبل .. لشو فتك ولهان
ولهان بيكم أكحل
العين .. وأضل سكران
دولبني الوكت .. بمحبتك خوان
& & &
اشتكي لك
جيتك أتنشف الدمعة بعباتك
من سكوتك اشتكي لك
يا لحبيب .. إن
طحت من الثريا
إنه بعيوني أشيلك
إذا اهلك بمهد هزوك
إنه برموشي الولي لك
وأرسمك فرحة على دمعي
اغدي شمعة واضوي لك
& & &
ياﮔلب
يا ﮔلب ما نفع بيك الندم
أنسه ودهم وانهي ساعات الألم
ما وفوا ضيعت عمرك عدم
نشفوا دمعك والـﮔلب منهم ما سلم
شـﮔد صرت الهم بلم
علمتهم .. درستهم .. جففت حبر القلم
بهجرهم .. مزقوا ذاك الحلم
ضيعت أيام عمرك رافع بحبهم علم
يا لبقيت سنين ماشي لأجلهم
ما مشوا لجلك .. ولا خطوة قدم
& & &
قصة هوانه
كافي ارجوك سامحني انسى الماضي وأحزانه
تمرمرنه بهواكم حيل تالي الوكت تنسانه
راح التعب وياكم براسي عتاب يفلانه
كم مره .. يناس الشوك بيكم .. يلهج السانه
نسيتي شلون أخاف عليچ اذا ﭼنتي حرانه او بردانه
كم مره آيدي تلمس خدودچ وتضل ايام خدرانه
العين تـﮔول ما شفته ودوم عليه سهرانه
يا خايب الوادم تسد ونهري نـﮔطع جريانه
الروح تـﮔول إلك انه
هواي عطشانة
إطراف جسمي اجتمعن وصاحن صوت
.. ليش أفلانه تنسانه
بـﮔلب مجروح أجاوبهن .. عاشر ناس غيري
وبعد أيام يتوسدون ذرعانه
وردة شوﮔنه الخضرة .. شنو السبب ذبلانه
صرت حـﭼايه بين الناس .. مثل آفلان من فشلوا نيشانه
ﮔالولي يخون بساع .. و أنغريت بإيمانه
إلف وسفه ع الزمن غدار
وبهل حال خلانه
دﮔوليلي شجاني وياچ هل فرحنه عدواننه
ولچ موصوچي .. العين الهوتچ .. والنصيب عليچ ودانه
& & &
حبيتچ
يا بنت الناس حبيتچ .. من بعد نضرة
يا بعد الروح أرد افديچ .. عيني الخضرة
حبيتچ والـﮔلب مشغول ..
وأنتي متكتره
آلم ﮔلبي من فرﮔاچ .. ياهو ليصبره
طول الليل ساهر تكبد روحي ألحسره
أرسلك سلام أحرمن لسعة الجمرة
د علميني تحبيني توديني بلكي رويحتي تبره
& & &
صعب وصفة
رف جنح العواطف
رفه اثر رفه .. مثل ريح العواصف من تهب تهفه
تناغيني طيوفك
لحضة المغفه .. مثل سعفه يهزني
الشوگ والرئفه
يهيم أذراع گلبي.. يحتضن ولفه
يا حارمني المنام .. وابد ما اغفه
كحل عيني رسمك .. تحضنه ألشفه
ابد مانسيت ذكرك .. لاولانتفه
ليت انصاغ ترجيه .. بحد حدر زلفه
أو لورت أساور.. لصبعة وﭼفه
اسلم الروح صوغه
.. ع الصدر تغفه
عطشان ألكلامه .. وضحكته الترفه
احتار بوصافة شگد .. صعب وصفه
& & &
بزفة وهلا هل
بزفة وهلاهل عرس .. ساروا عليا اليوم
علنوا حبيبي وصل .. اتنطره ومهموم
نضراته كلها غزل .. ومكحلة على الدوم
يمشي بدلال وخجل .. يخطو برقص معلوم
افرح حبيبي بأمل .. تنزاح كل لهموم
يا كحلتي بصورتك ..
أتخيلك بالنوم
بدموع عيني غرگت .. والگلب بيه أيعوم
تاريخ حبك صرخ ..
ليش الزمن معدوم
& & &
صدق العيون
ﭼذب ﭼذب ﭼذب
كلمن تحدث بالوا حض
ترى حﭼايات عينك تبقى أصدقهن
ﭼذب كل واحد
يگول عرفت طبعك
بس إنا ألطبعك أدرسته
وعرفتك زين يا لمدلول
يابو دميعة شتريد تگول
بطلت الحـﭼـي المعسول
ولا يهمك .. د بطله وبعد منه
اليوم لا .. لتگول
ادري انه اليحب مسكين
.. عنه الناس كلها تگوك
& & &
مطرب وأحب
مطرب وأحب ألسمره .. والبيضة هم والشـﮔره
أجملهن أطيب عشره .. يا ربي احفضهن دوم
خصلة جمالا بشعره .. قتلتني بي هل غره
يتطاول لحد خصره .. كالليل وعيونه نجوم
مفتون إنا بسحره .. وطولا بعد وسره
حيرني حاله وأمره .. يومه صحو يومي غيوم
تسبي الـﮔلب ودمره .. ضحكاته كلها خطره
تاه العقل والفكرة .. غرﮔـني ونسيت العوم
بنضرة التخزره تسكره .. من لأشرب لأخمره
سكرني حبه بنضرة .. من مزت شفا محروم
ذاب ألسان بذكره .. أنا اعشـﮔـة بالفطرة
أتواعد ويا مره .. واسهر معا ليله ويوم
هذا الـﮔلب ش يصبره .. لشكي الغرام وهجره
وامسح دموعي بصدره .. حارمها لعيوني النوم
غاب الـﮔمر من بدره ..
والورد سارق عطره
نبتن براعم صدره .. صرت بغرامه موسوم
& & &
هلهولة عرس
هلهولة عرس وأفراح .. ساعة طلتچ عندي
تذكرين من ألف .. زندچ وسط زندي
نسيتي شلون احك
..خدچ بخدي
أهيما بيچ انسى الناس
.. بس بجيتچ عندي
أشم عطرچ يفز ﮔلبي ..
ويرﮔص بسدي
شنو عيونچ مسحورة
.. بسحر هندي
فد رميه ورمتني
.. سهامچ بـﭼبدي
جرح ﮔلبي وخلص
..حتى الدم ألعندي
& & &
غربه وآنين
غربه دواره وانين بين حب ﮔلوبنا
وبين لوعات السنين تايهين .. مشردين
خلانا الوكت لا حبيب أيطيب جروح الخواطر
لا أخوه أتزيل من عدنا المخاطر
ﭼن بنت دنيانه سد بينه وبين الفرح كومة سواتر
غربة دواره وانين
خايبين ملوعين تفرح الدنية بهلاهل عيدها
الدمع يملا بسواجي خدودنه
تعوفنا يا فرح ليش أبساطة تعوفنه
تايهين مغربين
& & &
يا هناك
يا هناك ويا حلاك يا سعد كل من جاورك أو مشى وياك
يا سناك ويا ضواك يا بخت كل نجم صار بسماك
يا غلاك يا بهاك لمستك مرهم محبه ذابت جروحي بلقاك
يا غلاك ش غلاك كل ذهب هذا الزمن يذهب فداك
يا هواك ألهواك صار مجنون بمحبتك مايطيب الأ بشفاك
يا رؤاك من رئاك يذوب عمره يگوطر أيامه برضاك
يا ملاك ما نساك الفكر عايش يقظته وهم بعد حلمه معاك
يا شذاك ويا شداك همسك يطري الخواطر ضاميه الروح ألغناك
يا جفاك بجفاك ضاعت أيامي بونيني مره هات ومره هاك
& & &
شگد ترف
شگد عذب شفاف وترف
.. أنصحك انسى أيام الصلف
حوطوا نبع المحبة الهدف .. بلا خجل زرعك ينجرف
حوطوا بتاريخ اهلك نسف
.. هدموا صرح المحبة من السلف
الضمائر صارت آلميه بألف .. بلا رحم حطوا الأول خلف
بالحقد مغروس وبالنذالة معترف .. هذا طبع الناس طبعك
مختلف
رائع وطبع التسامح محترف .. تنسى الألم وترد حلف
كريم أخلاق خجلت الشرف .. والكرم أحرجت حتى الصلف
& & &
نتغازل
بصمت ﭼنه تمر ساعات نتغازل
أحاجيك وتحاجيني
بهمس عينك
أواسيك .. وتواسيني
برمشت رموشك اعد أيام عمري
واحسب بيهن سنيني
تذوب ألاه تتكسر كل مـﭼاميني
بحضورك يا بعد روحي وبعد عيني
& & &
تمرون بذكرنا
تمرون بذكرنا لو ما تمرون .. عليكم للفجر دمعن هل عيون
عليكم كالجمر بـﭼاها لوداع .. علينه بيا كتر ضميتوا لضنون
تمرون بذكرنا لو ما تمرون .. عليكم بألوفه فاض الـﮔلب
فاض
تمرون بذكرنا لو ما تمرون .. علينه بلا فرح ﭼنه بمطر ﮔيض
عليكم شاب الـﮔلب شاب .. علينه ناب بأثر ناب
تمرون بذكرنا لو ما تمرون
عليكم صار الأسد بوم .. علينه صار الحمل حوم
تمرون بذكرنا لو ما تمرون
كافيكم هجر عودوا يا لبعاد .. يالحبكم مرض كل يوم يزداد
& & &
محاورة عاشقين على الهاتف
هو : الو ..الو .. رد يالحلو
هي : وي هلا بهل صوت .. مشتاقة إلك موت
هو : تمرون بذكرنه لو ماتمرون.. يمن فدوه لهلعيون
هي : نمر والله بذكركم مانسينه ..الـﮔلب الكم نبض
..باقي بونينه
هو : هم الـﮔاك يوم واشتبك بيك..أضمك حيل وبـﮔلبي
أخليك
هي : كريمه شفاي
تتنطرك د أتهل .. تحير تبوس مره ومره أهلهل
هو : لهني الروح
بوجودك حبيبي.. وانهي اليوم كل حزني ونحيبي
هي : يهل تنشد علينه ما جفينه ..دعينه أدوم صلينه
واجينه
هو : هلا بجيتك حبيبي ويا هلا بك..دعيت الله بس ينهي
غيابك
& & &
محاورة بين أم العريس والعروس
ام
العريس : يمه يا بنيه
جيت اخطبچ لوليدي
سعيد ..
بلكي ترهم وانه زفكم يوم عيد
وافرح الكم والبس
الﭼرغد جديد ..
لو طلبتي عيوني نيشان وأزيد
العروس : عمة بس عندي طلب ..
هو شرط و ينرفع من بعدا العتب
أم
العريس : ﮔولي بنتي إنا أمه ..
وانه امچ ماني عمه
العروس : ستريچ وبدي وسترابلس البس ..
تنوره وقميص مخصر وأملس
مكياجي ﭼثير مكوم
مكدس..
وفراشي حرير ناعم الملمس
ألشقه جبيرة
بابها مقوس ..
تتأثث جديد بريموت يتحسس
ريوﮔـي كعك وﮔـيـمـر
مدبس ..
والخادم حلو زغير واخرس
حمامي عريض واسع
مشمس ..
سيارة حديثة والسائق مدرس
أتعشه خفيف بندق
وجوز والفستق مفلس ..
كلشي
لريدة أيصير حتى الجيب لو فلس
أم
العريس : عانس واحلامچ ﭼـبيرة ..
ابني ما
رايد أميره
ابني رايد بت حلال ..
ترضى بوساده وحصيره
& & &
زهيري
مو بدينه الگلب د گ و اصدر بحبك أمر
مو بدينه الجاي والراح ويمر
مو بدينه دموعنه تنزل جمر
وحق سنين صباي وعيوني الخضر
وحق اسم ربي وبجاه الخضر
وحق سعير البعد وجنان الخضر
ما تمر ساعة إلا اسمك يمر
& & &
الراح الراح
مـثل ناعـور أدور اني . . أكت ألجـاي والـراح
دمر ﮜـلبي وخلاني .. مثل حنطه بطحين الراح
هجرني وسلب شطئاني . .وصفـﮔت الراح بالراح
عـتبت علـيه بـﭼاني .. نساني وعـاف إحزاني
هديته إزهـار بستاني .. ولا مـرني ولاجـاني
بحصاده الشوك إنا الجاني .. ولو فد يوم يلـﮔاني
لهيمن بي وانسى الجاي والراح
& & &
لا تنسى الفرح
لا تنسى الفرح يا حبيب اشبع بي
وألجافاك خلا يعيش بأوهامه
خل جرحك وسام وللعشگ اهدي
بسوالف غرامك تشمخ الهامه
لان ذيب لعرفته وبالغدر تالي
من حقك تشك بدينه وإسلامه
إذا ندمان ﮔلبك لازم تواسي
بحب اخضر جديد وترفع إعلامه
غدار ألتحبه أنصحك تنسي
أنسى سنين جرحه و أنسى أيامه
أريد أوصل لـﮔلبك بيدي أداوي
لان ﮔلبك ﭼبير وصافيه أحلامه
& & &
محاورة على الجات لعاشقين
هي- ليش انته يا بذات هلـﮔد أناني.. بالفيس إلك
ساعات انظر وعاني
هو- لا إنا مو بذات واحلف بحبي.. بس ﭼنت مشغول
وانﮔطع دربي
هي- موصادگ أنت اتگول احلف بحبي.. احلف بعد حباب
بحلفان يسبي
هو- مو انتي اغلا الناس سابيني حبچ .. واحلف برب
الكون ربي وربچ
هي- أنساني يا بن الناس أنسى انه احبك .. راح العشگ
وياك من گطع دربك
هو- ليش العشگ يا هواي عندچ تواصل .. بالمسج وامسكول
نت ومبايل
هي- إي عيني انه ألنت كلشي بحياتي .. والمسج
والمسكول كل أمنياتي
هو- مو گلتي أنتي بيوم محتاجه أشمك .. وافتح إلك
ذرعان وبروحي أضمك
هي- لك هذا مو گلبي بس من لساني .. لتصد گ انه بيوم بالحب أعاني
هو- لچ انه هم مجنون صدگت حبچ .. هيچ وطلع ﭼذاب
ملعون گلبچ
& & &
واشي ذبحني
رائع بطبعك بحسنك بكلامك ..
والگلب بجمالك يبتهل متجلي
أسألك بالله وبالنبي وإسلامك ..
أرحم عطوف ألك معتلي
علامك يالعزيز مربط خيامك ..
ناوي الرحيل بنص
ربيعك خلي
أخلف ظنونك تراني اهو گدامك ..
مالي بخلافك يا لأعز في دلي
واشي ذبحني يبتغي إيهامك ..
وانأ بمحراب حبك
معتكف يا خلي
& & &
محاورة عاشقين
هو : عنيد وعاندت أهلي وناسي
ابد بس بيك أفراحي وناسي
ولا
اذكر قهر منك وناسي
وبعد
كل هذا تنسى تمر عليه
هي : ابد
ما نسيت دوم عليك انشد
نسيت
اسمي وبس أهواك انشد
بحبل و ياك بلكي بيوم انشد
نسيتي يـﮔول وبلياه صار النوح أليه
هو : أذا
ناح الﮔلب عندچ
.. روحي جالسه بسدچ
العقل عندي ترى وشل .. ترى شال
دعيت
تصيرين إلي عيوني
.. ﮔمر ليله على متوني
.. بلا ربطه بلا شال
& & &
ترﭼية ذهب
ليت آنصاغ لحبيبي ترﭼية
ذهب لازﮔـة ع الخد
كل لفته أروح
وارجع أتمدد
أحبب بيك
بخدودك ولا أنرد
يضل حران ﮔلبي بشوگ ما يبرد
عزيز المع صفار يشع
لا ابيض ولا اسود
كل لحضه أضل و ياك ساع بساع
روح بروح
خد بخد
& & &
غزل العيون
بصمت ﭼنا أحاﭼيك وتحاﭼيني
بهمس عينك غزل أساقيك و تساقيني
برمشه رموشك أواسيك وتواسيني
واعد أيام عمري واحسب بيهن سنيني
تذوب ألاه تتكسر كل مـﭼاميني
بحضورك يا بعد طولي وبعد عيني
& & &
ﮔـتلك ياﮔلبي
ﮔتلك ياﮔلبي شبيك
لتحن ولك خليك
حلو ويغرر بيك
هم يهجر وياذيك
لتقرب عليه فتان
تهوى وتضل حزنان
ﮔلبا مو ﮔلب إنسان
متعود على الهجران
ﮔتلك ياﮔلب
ملﭼوم
حبه إلي ما يدوم
احرمني حبه النوم
حيران إنا ومهموم
ﮔتلك ياﮔلب عوفه
انسه اسمه وحروفه
باﭼر حنة ﭼفوفه
صابغ شعره وزلوفه
وك غره الجمال البيه
لاتئذي الﮔلب خليه
& & &
حكم ربي
حكم ربي أشوفك وانجبر بيك
احاﭼيك بغزل لو ما احاﭼيك
يا لمدلل غرامك زادني هموم
خجلت الﮔمر منك والنجوم
صرخ حبك يا خلي يرتجي يوم
الاﮔيك بفرح لو ما الاﮔيك
استحى لساني وتعثر من تهل جاي
يا صوت الفرح يا نغمة الناي
اسقيني الغرام من الشفايف هاي
يهيم الروح عطرك
ربي يحميك
جمد رمشي بوجودك يا ضوى العين
الزمن شاخص وﮔف السنة بيومين
يا لمدلل دمعنه يسيل نهرين
بس روحي تحسك تشتبك بيك
& & &
ﭼنه ﭼنه
محروك بغرامك هل ﮔلب ﭼنه
تصيـح أمي وتـريـد اليـوم ﭼـنه
أذكـرك بـالـغـرام شـلون ﭼـنه
طحن ﮔـلبي فراﮔـة شلون بيه
& & &
تعال
عود يا معود تعال
لا أزال اعشق احبك يا غزال
لا أزال بحبك أبحر بالخيال
لا أزال افخر وأطاول جبال
بس تعال الﮔلب ما ملك محال
بس تعال مرمرت روحي بدلال
بس تعال يا ملك كل الجمال
& & &
حبچ مشكلة
أنتي حبچ مشكلة .. خلاني طول الدرس محتار بالمعضلة
يا أغلا من كل غلا .. تمشين طول الدرب بحنية متمهلة
ولكوني مشتاق الچ .. ما ادري أنتي سرعتي
.. لو دربي منچ خجل .. والطول مالا اختزله
مشكلة .. أنتي حبچ مشكلة
خلاني وبكل درس .. أعرب عيونچ فعل .. ولغمزه اكبر فعلله
بالجبر أنتي ضرب .. برهانه إنا أنطرح .. وبالجمع حل
المسألة
بتاريخ هذا العصر جيوش حب الولف .. بالگلب متجحفلة
باللغة أنتي أمر وبحبچ إني أنجبر .. والعشگ مجرور اله
مشكلة حبج مشكلة
& & &
حبكم گضة
شلون بينة انودكم .. خايب لا تضن حبكم ﮔضة
چنت اضن ضيكم فجر .. حبكم علامة توسم سنين العمر
تالي چتالة انتووا بغدر ..أبقى اعد أيام ألوفة
حطمتوا گلبي بهل جفه .. بس كون أشم منكم عطر
بس كون أكحل العين برماد العمر
ابق انتظر دايم أفكر بيك ساهر للفجر
& & &
تحن يا هواي
ردت فد يوم تحن يا هواي وتطيب ليلينا
بعشرتك هاي شفنه إشكال
حزن وهموم ومعاتب ولا فد يوم ملينا
رجينا رضاك ولا ترضى
ﮜلت محروم من صباي
ألك إشكال سوينا
لعبنا وياك .. سليناك
لجل تفرح مشينة على أدينا
گلت فد آه بﭼينة هواي
صلينه و دعينة اشفيه يا ربي لأجل عينه
& & &
لا مترجع
شعاتب و الرسائل حرگتوها
روحي ترفه دمرتوها
الأساور هديت الكم .. ما لبستوها
چلمة منكم انتظرت أيام تگلوها
نسيتوها .. وتعوفوها .. ومگلتوها
شعاتب والعتب وياچ
ما ينفع
الوسايد من دموع العين دوم تنگع
يصرخ ﮔليبي بهواچ
يقنع ابنفسة ترد لـﮔليبي ترجع
لا .. متسمع لا مترجع
أنسيت كافي أهجع
ما اضن تذكر هواك .. وإلك تركع
موفيه والله هيه مو وفية
& & &
يشگر يغالي
گضيت وي بت الطرف .. احلي أليالي
تالي بزت بألوفة
..نكرت دلالي
ياحبيب اشمحلى
العمر.. للگلبه خالي
وشمقسى أيام الهجر.. ياشگر يغالي
عشگ العشگته وياك.. لا ماله تالي
صديت وصدودك غدر .. أرد اسأل سؤالي
لنسيانك يزغير العمر .. مگدر شمالي
بالعهد ما وافيت .. مأمنك خبر جالي
دوم أفز نص الليل .. درحم بحالي
يالي نسيت أهواك .. دوم أنت بخيالي
حن إلي.. يا منور الليالي
& & &
حسبالك نسيتك
حسبالك نسيتك يا اعز الناس
من گد العشگ بيك
انه مفتون
ضرب حبك حبيبي العقل والرأس
تيهت الطريق وصرت مجنون
يا ألكلك جمال وذوق
و إحساس
إلك روحي وحياتي وانه ممنون
لو قست الغرام بفرد مقياس
تلـﮔاني بغرامك معفي كل يوم
& & &
ليست هناك تعليقات:
إرسال تعليق